انهاردة الصبح - يوم الثلاثاء 6 أبريل - كنا داخلين الجامعة زى كل يوم
الأمن اللى على البوابة كان متاهب ، بالفعل كان فيه عدد كبير جدا من الظباط والعساكر وغيرهم متواجد على باب الجامعة الصغير
الغريب هو وجود بعض أفراد غير معروفين ، لابسين زى مدنى زينا تماما - واضح انهم بلطجية -
ومنتظرين برضه على باب الجامعة نفسه
بدأ الاحتكاك يحصل مع الأمن
احنا كنا داخلين ناويين نعمل مسيرة بتتكلم على حقوق الطلبة داخل الجامعة
اليوم سميناه يوم الحريات ، كنا هنطالب بترخيص سعر الكتاب الجامعى وطرد الحرس الجامعى خارج سور الجامعة
بدأ الأمن يحتك بينا على البوابة ، ويضايقونا جدا ، وبعدين بدأوا يزقونا على سلالم البوابة للداخل
وقفلوا البوابة ومنعوا أى حد من انه يدخل الجامعة ، وبدأت الوقاحة
بدأ العساكر يخلعوا الأحزمة بتاعتهم " الآيش" ، ويضربونا بيه بلا هوادة أو رحمة ، أما الظباط البواسل
بدأوا يقطعوا أغصان الأشجار الموجودة بجانب باب الجامعة ويضربونا بيها برضه بلا رحمة
الموضوع ده استمر أكثر من ربع ساعة
محدش يظن يا اخوانا ان ده مشهد من فيلم لعبد الحليم حافظ
ده هو اللى حصل بالفعل انهاردة الصبح على بوابة الجامعة
طبعا احنا - طلاب الاخوان - كنا بندافع عن نفسنا بقدر المستطاع
لكن تفتكروا ايه اللى ممكن يعمله طالب جامعة بايده فى مواجهة أحزمة وعصيان
كانت نتيجة الأعمال دى ، أخ من كلية تجارة اتقطع قميصة تماما ، مفيش أى شئ يدل على انه قميص
وأخ تانى من حاسبات انفتح دماغه من الوراء وآخر انفتح دماغة من قدام
كان نصيبى فى الموضوع ده حزام بسيط كدة على ظهرى فقط والحمد لله
الجريمة اللى ارتكبها طلاب الاخوان وعشانها بيتعمل فيهم كدة
انهم بيقولوا الله غايتنا والرسول قدوتنا والقرآن دستورنا
يا ترى ايه رأيكم فى اللى حصل وايه المفروض يكون رد فعلنا كطلاب الاخوان المسلمين تجاه الوقاحة دى
نسيت أقول لكم ان فيه كلمة كنت عاوز أقولها لرجال الأمن البواسل الموجودين على البوابة
ان الراجل لما بييجى يضرب بيضرب بايده مش بحزام........!!!!
